ایک اور مبارک- ایک اور مہمان

پونے تین سو گز کا ایک مکان
مشترکہ خاندانی نظام کے تحت
جس میں چھ خاندان آباد
دو نسلیں
والدین اور ان کے پانچ بیٹے

اوپر نیچے کی منزلوں پر
اوسطا بارہ بائے چودہ کے
چھ کمرے
کمروں کے بیچوں بیچ
چھت والا ایک ہال
جو لونگ روم بھی ہے
صحن اور دالان بھی

اسی طرح کے ایک کمرے میں
وہ چوتھی بہو بن کر آئی۔
بنا کھڑکیوں کے کمرا
بنا تازہ ہوا اور سورج کی روشنی کا کمرا
جہیز کے سامان سے لدا کمرا
پہلے سال دو سے تین کا مکین بنا
اور دوسرے سال دو سے چار کا
افراد کی گنتی کی تبدیلی تیزی سے ہوئی
جو نہیں بدلا
وہ لمبائی، چوڑائی کی پیمائشیں تھیں۔

پہلے پہل ڈبل بیڈ شیئر ہوا۔
پھر ایک اور چارپائی کمرے میں مستقل رکھنی پڑی۔
کپڑوں کی الماری میں سبھی کے لئے
جگہ سکڑنے لگی۔
کھلونے، بستے، کتابیں، پیمپرز، جوتے، فیڈرز
مسلسل وسعت چرانے لگے۔
جہیز کی پیٹیاں، صوفے کھلے ہال میں رکھے گئے۔

اس کے کمرے کی طرح
ہر کمرے میں افراد بڑھتے گئے.
ایک کمرہ دو افراد سے
ایک کمرا ایک خاندان
سمیٹتا گیا۔

اور ایسے میں جب کسی اور
،نئے مہمان کی نوید
ننھی جان کی آمد کی
،خبر ملتی
تو دل میں ایک حسرت ابھرتی
کاش نسلوں کے بڑھنے سے
زمین کے ٹکڑے بھی بڑھیں۔
کمرے بھی کشادہ ہوں
تاکہ
خوشخبریاں، خوش خبریاں ہی رہیں۔
خوش بختیاں ہی لگیں۔