خالی پن

اب وہ ایک دوسرے کا
ہاتھ بھی پکڑیں
تو لمس کی حرارت برف ہی رہتی ہے۔
نرم بوسہ بھی دیں
تو لبوں کی گرمی تھکن نہیں چنتی۔
پھول بھی بھیجیں
تو ان کی خوشبو مہک نہیں دیتی۔
کیک بھی کھلائیں
تو زبان کی تلخی، میٹھی نہیں ہوتی۔
محبت بھرے پیغام بھی ارسال کریں
تو دل نہیں پگھلتا۔
پیار بھرے وعدے بھی کریں
تو یقین کا پنچھی ہاتھ نہیں پکڑاتا۔
تحائف بھی دیں
تو خوشی کا موسم روٹھا ہی رہتا ہے۔
پاس بھی بیٹھیں
تو ساتھ کا احساس نہیں جاگتا۔
ہم سفر بھی ہوں
تو تحفظ کی نیند نہیں آتی۔

،ان کی قربت
،چاہت
،خیال
،اعتبار
،تحفظ
،دھیان
،ہمراہی
کے سبھی موسموں کو
،ذمہ داریوں
،لاپرواہیوں
،بے توجہی
،بے توقیری
،بے دھیانی
،بے وقعتی
،بے اعتباری
،ترشی
،کڑواہٹ
کی دیمک عرصہ ہوئی
اندر ہی اندر
چاٹ گئی ہے۔